Mae'r ymddygiadau hyn yn llunio sut rydym yn trin ein cwsmeriaid a'n cydweithwyr bob dydd.
Maen nhw'n ein helpu i wneud y Senedd yn lle gwych i weithio.
Ein gwerthoedd
Mae ein gwerthoedd yn diffinio beth rydym yn ei wneud a sut rydym yn ei wneud.
Rydym yn gynhwysol ac yn garedig ac rydym yn gwerthawrogi cyfraniadau ein gilydd wrth ddarparu gwasanaethau.
Angerdd
Rydyrm yn bwrpasol wrth gefnogi democratiaeth gan dynnu ynghyd I wneud gwahaniaeth i bobl Cymru.
Blachder
Rydym yn arddel arloesedd ac yn dathlu ein llwyddiannau fel tim.
Beth mae ein cydweithwyr yn ei ddweud?
Leanne
Leanne ydw i, Prif Swyddog Pobl ac Uwch-hyrwyddwr Symudedd Cymdeithasol. Ces i fy magu yng nghymoedd de Cymru, a fi oedd y cyntaf yn fy nheulu i fynd i'r brifysgol. Nid oedd fy llwybr i Adnoddau Dynol yn un syth – rwyf wedi gorfod ymgodymu â galar (collais fy mam pan oeddwn i'n 20 oed ac yn y brifysgol), amheuaeth, a syndrom y ffugiwr – ond fe wnes i ddal ati.
Rwy'n credu na ddylai pen draw eich taith gael ei benderfynu gan eich man cychwyn. Dyna pam helpais i lansio RISE, ein rhwydwaith symudedd cymdeithasol, a dyna’r rheswm rwy’n dadlau dros fynediad teg i gyfleoedd. Rwy'n angerddol dros greu gweithle lle gall pawb ffynnu, ni waeth beth fo'u cefndir.
Mae symudedd cymdeithasol yn rhywbeth personol i mi. Os gallaf helpu hyd yn oed un person i gredu bod "dod yn rhywbeth" yn bosibl, yna mae'n werth chweil.
Lukas
Rwy'n Ddirprwy Glerc Pwyllgor ac rwy'n caru fy swydd. Yn y Senedd, rwy'n gweld democratiaeth Cymru ar waith, a chaf gefnogi’r Pwyllgor yn ei rôl wrth ddwyn Llywodraeth Cymru i gyfrif, yn enwedig mewn meysydd allweddol, fel yr amgylchedd a thrafnidiaeth.
Mae gweithio yma yn caniatáu imi fod yn rhan o rywbeth mwy, ble gall pob adroddiad, pob argymhelliad a phob sgwrs helpu i wella bywydau pobl. Nid fi yn unig sy’n teimlo hyn – mae fy nghydweithwyr hefyd yn angerddol am greu Cymru well i bawb, waeth beth fo'u cefndir neu o ble maen nhw'n dod.
Shahzad
Shahzad yw fy enw i, ac ymunais â'r tîm Diogelwch saith mlynedd yn ôl.
Yn fy ngwaith fel Swyddog Diogelwch yn y Senedd, mae pob dydd yn wahanol. Pa un a fyddaf yn cyfarfod â gwesteion sy'n mynd i ddadl fyw neu’n croesawu myfyrwyr sydd wedi dod i ddysgu am ddemocratiaeth Cymru, byddaf yn sicrhau bod pawb yn cael cyfle i gael profiad diogel yn yr adeilad.
Yn ystod fy amser yn y Senedd, braint i mi oedd mai fi oedd cludwr olaf y byrllysg ar gyfer Ei Mawrhydi'r Frenhines Elizabeth II a chludwr cyntaf y byrllysg ar gyfer Ei Fawrhydi'r Brenin Charles III. Ar ben hynny, cefais fy ngwahodd i dderbyniad ym Mhalas Buckingham a gynhaliwyd i gydnabod gwaith a chyflawniadau arwyddocaol y Senedd.
Senedd ddwyieithog
Rydym yn falch o fod yn sefydliad dwyieithog sy'n gweithio ac yn cyfathrebu yn y Gymraeg a'r Saesneg. Rydym yn darparu gwasanaethau i Aelodau'r Senedd a'r cyhoedd yn ddwyieithog.
Nid oes rhaid i chi siarad Cymraeg rhugl i ymuno â ni. Rydym yn hysbysebu llawer o rolau ar Lefel Cwrteisi Cymraeg, sy'n gofyn am ddealltwriaeth sylfaenol o'r iaith a'r gallu i ynganu enwau ac ymadroddion syml Cymraeg. Ni fydd hyn yn cael ei asesu cyn i chi ymuno â ni. Fodd bynnag, os byddwch chi'n dechrau gyda ni ac nad ydych chi'n cyrraedd Lefel Cwrteisi'r Gymraeg, byddwch chi'n cael hyfforddiant gan un o'n tiwtoriaid Cymraeg ymroddedig.
Er mwyn i ni allu darparu gwasanaethau dwyieithog yn effeithiol, mae llawer o'r swyddi rydyn ni'n eu hysbysebu yn gofyn am lefel benodol o iaith Gymraeg (1-5). Bydd y swyddi hyn wedi'u marcio'n glir ar y disgrifiad swydd a'r hysbyseb.
Os byddwch yn gwneud cais am un o'r swyddi hyn, bydd yn rhaid i chi gwblhau asesiad Cymraeg yn ystod y broses recriwtio.
